ភ្នំពេញ៖ ក្រសួងទេសចរណ៍ចេញសេចក្តីជូនដំណឹងស្តីពីការអនុញ្ញាតប្រភេទទិដ្ឋាការឆ្លងកាត់ (D) សម្រាប់ភ្ញៀវទេសចរ តាមនាវាទេសចរណ៍ដែលចូលមកទស្សនាព្រះរាជាណាចក្រកម្ពុជាក្នុងរយៈពេលខ្លី ស្របតាមការសម្រេចរបស់ក្រសួងមហាផ្ទៃ។

ក្រសួងទេសចរណ៍ជូនដំណឹងដល់ក្រុមហ៊ុនទេសចរណ៍ ទេសចរអន្តរជាតិ និងសាធារណជននៅទី២៨ ខែកុម្ភៈឆ្នាំ២០២៣ ថាទេសចរអន្តរជាតិដែលធ្វើដំណើរឆ្លងកាត់កម្ពុជាតាមរយៈនាវាទេសចរណ៍ ហើយចូលមកទស្សនាកិច្ចកម្ពុជាក្នុងរយៈពេលខ្លី ត្រូវបានអនុញ្ញាតឱ្យស្នើសុំប្រភេទទិដ្ឋាការឆ្លងកាត់ (D) ចាប់ពីថ្ងៃជូនដំណឹងតទៅ។

ក្រសួងទេសចរណ៍បញ្ជាក់ថា ប្រភេទទិដ្ឋាការឆ្លងកាត់ (D) ត្រូវបានផ្តល់ជូនសម្រាប់ជនបរទេសមិនមែនអន្តោប្រវេសន្តដែលជាអ្នកដំណើរឆ្លងកាត់ អ្នកបើកបរ បុគ្គលិក និយោជិត និងកម្មករលើយានយន្ត រថភ្លើង នាវា ឬយន្តហោះនិងអាចស្នាក់នៅក្នុងកម្ពុជាបានរយៈពេល ៥ (ប្រាំ) ថ្ងៃ ស្របតាមអនុក្រឹត្យលេខ ចុះថ្ងៃទី១០ ខែមិថុនា ឆ្នាំ២០១៦ ស្តីពី “បែបបទសម្រាប់អនុវត្តចំពោះការអនុញ្ញាតឲ្យជនបរទេសមិនមែនអន្តោប្រវេសន្ត ចូល ចេញ និងស្នាក់អាស្រ័យ នៅព្រះរាជាណាចក្រកម្ពុជា”។

គួរឱ្យដឹងដែរថា ក្រសួងទេសចរណ៍ស្នើឱ្យក្រុមហ៊ុនទេសចរណ៍ ទេសចរអន្តរជាតិ និងសាធារណជនជួយផ្សព្វផ្សាយបន្ត៕